رسالتي لمريم وكل المليون اللي غيرنا

السلام عليكم ورحمة الله وبركاته

هذي رسالتي لمريم وكل المليون اللي غيرنا

حابه أقولك اللي انتي تعرضتي له انا كمان تعرضت له ومليون غيرنا اطفال وكبار ذكور و إناث .

هذا مو غلطنا عشان نحبس نفسنا فيه طول العمر اللي اعتدى علينا شخص مريض يوم القيامه هو بيحاسب ويتعذب واحنا بالنعيم والجنه ان صبرنا و شكرنا الله.

انتي من اخوك كان متكرر وعامل بقاله مره وحده انا قصتي تشبه قصتك مع شوية اختلافات انا عامل في البيت من٣ ل٥ ابتدائي ولمن تكلمت صار ابوي يعتدي علي .

مريم هذا الشي صار وانتهى غيرك يتمنى ينتهي 

بس لحظه فكري انتي بالنسبه لك هذا ماضي انتي مخليته حاضر ومستقبل وانتي اخترتي في بنات تتمنى هالشي يوقف بتصحى كل يوم عارفه ان اللي صار امس بيصير اليوم وبكره حاسه بحجم النعمه اللي انتي فيها؟

شوفي بقلك كلام ماهو إلا من وحده عاشت التجربه باكد لك شعورنا واحد حلو انا نلاقي دعم من اللي حولينا وبالذات أهلنا بس مو ضروري أولاً وأخيراً انا و انتي والمليون اللي غيرنا نقدر نغير حالنا للأفضل نقدر نقول للي حولينا( اهملتونا واعتدى فلان علينا رجعتو اهملتونا عذبنا انفسنا وبكينا بس خلاص احنا كبار و وعينا ماعدنا بحاجة اهتمام أو خوف من احد علينا احنا بنحمي انفسنا واحنا بنبني مستقبلنا واحنا أقويا)

حاسه بقهر وان حقك ضاع حاسه بحرقت قلب كيف اهلي اهملوني ليش انا بالذات تعرضت لهذا الشي انتهى الموقف بس في بالي يتكرر وانا صاحية اذا سمعت اسم اللي اعتدى علي اتمنى بيدي اقتله وأريح قلبي هو يضحك ولا همه وانا ابكي واحترق واتعذب!؟

اذا نمنا كل يوم بيتكرر نفس الحلم ويمكن تتغير التفاصيل بس يبقى نفس الشخص ونفس الجريمه بتتكرر نصحى مفجوعين نحس بضيق تنفس ساعات نحس ببرد ونرتجف ساعات حراره حتى بقلبنا بعدها نبكي لمن نتعب وننام بدون ما نحس وساعات نبكي لمن يطلع الصبح نروح للمدرسه أو الجامعه أو العمل نجلس طول يومنا كاننا فحلم نحس الحياه بارده مو قادرين نفهم شي أو حتى نفكر بشي ننتظر بس متى نرجع غرفتنا

نبغى نكمل بكانا 

مثلاً كنا بمناسبة نحس الكل يلاحظنا الكل يراقبنا من لمن ندخل يمكن نشك هم عارفين ايش صار! نخاف من اي شخص نكره احد يضمنا لو أمنا أو اقرب صديقه بعضنا حتى ماعنده صديقه وعايش بانطوائيه ، الرجال رعبنا لو جات عين رجال فعيني بمول أخاف وآرتبك أحسه يبغى نفس الشي مني 

الى يومكم هذا اعترف اني ماعشت طفولتي لبست العبايه واتحجبت من بدري ما عمري لعبت بملاهي اجبرت نفسي اتصرف تصرفات اكبر من عمري مع انو كنت اتمنى اتصرف مثل باقي الاطفال بس كان في شي يمنعني ما اعرف ايش 

غالبيتنا بننتقم من انفسنا وهذا غلطنا الوحيد بس ما فات الاوان نعدله

انا حاولة الانتحار مره والحمدلله كانت محاولة فاشله وانتهت بشهر تنويم بالمستشفى ماحد توقع ان طفله بالمتوسط بتحاول تنتحر بنفس طريقتي  وإلا الآن ماحد عارف

جربت كل شي حرام مع بويات ومع شباب معسل ودخان الآن اكتشفت فعلتي ما كانت إلا انتقام من ذاتي

وكثير وكثير من الاحاسيس المؤلمة 

بتقولو مستحيل نتخلص منها بقولكم انا تخلصت منها كلها انا واثقه بربي ربي مايكتب إلا كل خيره  الله اعدل الحاكمين ويابختنا الله بياخذ لنا حقنا احنا ماغلطنا احنا مرينا بتجربه محتاجه طبيب نفسي مو احنا اللي نحتاج كأشخاص لا التجربه بحد ذاتها تحتاج اللي اعتدى علينا شخص مريض حسابه فالأخره احنا لنا الاخره باذن الله وايش يمنع ان الدنيا تكون لنا نحقق انجازات ونفرح واحنا زينا زي غيرنا.

@limathaana